Home »

10 რჩევა პიარ გეგმის შესადგენად

mo-rotator-pr-planningელდარ პირმისაშვილი

საზოგადოებასთან ურთიერთობის პრაქტიკა ეხმარება ორგანიზაციას საზოგადოებასთან ეფექტური ურთიერთობების დამყარებას, ჩამოყალიბებასა და შენარჩუნებაში. პიარი ზრუნავს კომპანიის ან პიროვნების რეპუტაციასა და  მისი იმიჯის აღქმაზე საზოგადოებაში. პიარი კეთილგანწყობილ, პოზიტიურ სივრცეს ქმნის სადაც კომუნიკაციაში ჩართული მხარეები კარგად გრძობენ თავს.

როგორც წესი, ყველა კომპანიაში არსებობს სტრატეგიული გეგმა, მისია და ღირებულებები, რომელზეც დაფუძნებულია კომპანია და რომელიც გამოხატავს მის წარსულს, აწმყოსა და მომავალს. პიარ გეგმა კომპანიაში არსებული სტრატეგული გეგმის შემადგენელი ნაწილია და აუცილებლად უნდა გამოხატავდეს კომპანიის  მიზნებს, მისიას, ღირებულებებს, კორპორაციულ კულტურას,  უნდა აგრძელებდეს კომპანიაში დამკვიდრებულ სტრატეგიულ კურსს.

პიარ გეგმის შემუშავების სახელმძღვანელო დაეხმარება ყველა სახის ორგანიზაციაში მომუშავე პიარ სპეციალისტებს, პიარ კონსულტანტებსა და პიარ მენეჯერებს საკომუნიკაციო ხასიათის პრობლემატიკის იდენტიფიცირებასა და მართვაში.

ნაბიჯი I – კომუნიკაციური აუდიტი

პიარ გეგმის შედგენისას ერთ-ერთი მნიშვნელოვანი ელემენტი თქვენს ორგანიზაციაში მიმდინარე სიტუაციის ანალიზია, რაც თქვენი კვლევის შედეგებს ეფუძნება. პიარ სპეციალისტისთვის დიდი მნიშვნელობა აქვს ანალიზისა და სინთეზის უნარს, რომელიც დაგეხმარებათ არსებული სიტუაციის ეფექტურად შეფასებაში.

კომუნიკაციური აუდიტი მოიცავს ყველა იმ ინფორმაციასა თუ მონაცემს, რომელიც თქვენ უნდა მოაგროვოთ ორგანიზაციის გარე თუ შიდა გარემოცვის შესახებ.

სიტუაციური ანალიზის მომზადებისას, აუცილებელია, კვლევის შედეგები ლოგიკური და ადვილად გასაგები თანმიმდევრობით წარადგინოთ. შეადგინეთ კომუნიკაციური აუდიტისა და აუდიტორიის კვლევის შედეგების სია. თუ თქვენ გამოყენებული გქონდათ ზემოთნახსენები სავარაუდო მონახაზი, მაშინ ხელთ უნდა გქონდეთ ყველა აუცილებელი და საჭირო ინფორმაცია.

ნაბიჯი II  – პრობლემა და შედეგები

პრობლემის ძირითადი არსის განსაზღვრა თავისთავად მოკლე და დაკონკრეტებული უნდა იყოს. თუ შესაძლებელია, ჩამოაყალიბეთ პრობლემის დეტალური აღწერა 40 ან ნაკლები სიტყვის საშუალებით. მნიშვნელოვანია პრობლემის დეტალური და კონკრეტული  ჩამოყალიბება, რადგან მასზეა დამოკიდებული მთლიანი გეგმის წარმატება.

შეეცადეთ, ჩაწვდეთ პრობლემის ძირითად მიზეზს და ზუსტად დაადგინოთ, როგორი დამოკიდებულება (რას ფიქრობენ ისინი) ან ქცევაა (რას მოიმოქმედებენ ისინი ანუ ვისაც პრობელმა ეხება) საჭირო, რომ მოახდინოთ ზეგავლენა არსებულ სიტუაციაზე. პრობლემის მიზეზების დეტალური დამუშავება და ანალიზი დაგეხმარებათ, ადვილად იპოვოთ მისი კორექტირებისა და საბოლოოდ აღმოფხვრის გზები.

ნაბიჯი III – პიარ გეგმის მიზნები

ჩამოაყალიბეთ თქვენი პიარ გეგმის მიზნები მარტივად, მკაფიოდ და დამაჯერებლად. დასახული მიზანი უნდა პასუხობდეს კითხვას: რა შედეგი გვინდა მივიღოთ?

პიარ გეგმის მიზანზეა დამოკიდებული მთლიანი კამპანიის წარმართვა. ამიტომ, სწორად უნდა მოახდინოთ მიზნის იდენტიფიცირება და ჩამოყალიბება.

ნაბიჯი IV – მიზნობრივი ჯგუფების/აუდიტორიის იდენტიფიკაცია და მესიჯები

მიზნობრივი ჯგუფების იდენტიფიცირება თქვენი გეგმისათვის სასიცოცხლოდ მნიშვნელოვანია. თქვენ უნდა ისაუბროთ საჭირო ადამიანებთან.

სეგმენტირება ეს არის მომხმარებლების დაყოფა სხვადასხვა ჯგუფების მიხედვით. სეგმენტირება გვეხმარება, გავიგოთ მომხმარებლების მოტივები რათა ჩვენი კომუნიკაცია იყოს უფრო ეფექტური.

მას შემდეგ, რაც  მოახდენთ  აუდიტორიის იდენტიფიცირებასა და პრიორიტეტების  განსაზღვრას,  აუხსენით კლიენტს, რა მესიჯი უნდა გაეგზავნოს შერჩეულ მიზნობრივ ჯგუფებს.

ისევე, როგორც პრობლემის ფორმულირება, თქვენი გზავნილები მიზანმიმართული  უნდა იყოს და მათში აუდიტორიისათვის  განკუთვნილი სარგებელი მკაფიოდ უნდა იყოს ნაჩვენები. სცადეთ მესიჯების გარკვეული რაოდენობის შედგენა და შემდეგ თითოეული აუდიტორიისთვის  შეარჩიეთ ერთ-ერთი, რომელიც ყველაზე მნიშვნელოვანია თქვენი გეგმის ამოცანებისათვის.

ნაბიჯი V – სტრატეგია

ამ ნაწილში თქვენ დაგჭირდებათ სტრატეგიათა გარკვეული რაოდენობის წარმოდგენა, რომელთაგან თითოეული თავად წყვეტს პრობლემას. მაგრამ ეს იმდენად მნიშვნელოვანია გეგმის წარმატებისთვის, რომ ყველა ძალისხმევა უნდა იქნას გამოყენებული გამორჩეული სტრატეგიული ალტერნატივების წარსადგენად.

ზოგჯერ, ოპტიმალური სტრატეგიის შესამუშავებლად, მიმართავენ გონებრივი შტურმის ტექნიკას. აწონ-დაწონეთ თითოეული განხილული სტრატეგიის დადებითი და უარყოფითი მხარეები.

ეცადეთ, კლიენტს სხვადასხვა ვარიანტი შესთავაზოთ. თუ თქვენ შეძლებთ ბიზნესის ყველა რისკისა და შესაძლებლობების იდენტიფიცირებას, ამით კლიენტს არჩევანის გაკეთების საშუალებას მისცემთ. დამკვეთს სჭირდება სიცოცხლისუნარიანი გეგმა. მან უნდა იცოდეს ყველა შესაძლო ვარიანტის უპირატესობები და უარყოფთი მხარეები, რათა გადაწყვეტილება გამოიტანოს არა ემოციებზე, არამედ ფაქტებზე დაყრდნობით.

ნაბიჯი VI – ტაქტიკა

ეს არის ის ნაწილი, რომელშიც ზუსტად უნდა აუხსნათ კლიენტს, რა საკომუნიკაციო ინციატივებს სთავაზობთ მას. თუ უკვე ჩატარებული გაქვთ რამოდენიმე კრეატიული  გონებრივი შტურმი, მაშინ უნდა განავითაროთ და დახვეწოთ შესაძლო ტაქტიკების სია, რათა მიაღწიოთ მანამდე ჩამოყალიბებულ მიზნებს.

ამ ნაწილში თქვენი ტაქტიკის წარდგენისას დარწმუნდით, რომ შეგიძლიათ უზრუნველყოთ მოკლე (ერთიდან სამ აბზაცამდე) აღწერა. განსაკუთრებით  გამოყავით  აუდიტორია და მისთვის განკუთვნილი გზავნილი; ასევე, კვლევის შედეგებზე დაყრდნობით, განმარტეთ კონკრეტული ტაქტიკის გამოყენების მიზეზები  და მოსალოდნელი შედეგები.

ნაბიჯი VII – კალენდარი

კალენდარში უნდა აჩვენოთ, რომ გეგმა მთლიანად გაქვთ მოფიქრებული, ყველა წვრილმანი დეტალიც კი. ამ ნაწილში წარადგინეთ თქვენი გეგმის კალენდარი. იყავით კონკრეტული და ამავდროულად ამომწურავი. შეიტანეთ კონკრეტული თარიღები, სადაც ეს შესაძლებელია.

ჩამოაყალიბეთ კონკრეტულად როდის აპირებთ თქვენი საქმიანობის ეტაპებისა თუ საკომუნიკაციო ტაქტიკის გამართვას, რომელიც გქონდათ მითითებული. ასევე ახსენით ვინ შეასრულებს კონკრეტულ სამუშაოებს.  და რათქმაუნდა აუცილებელია, განსაზღვროთ პიარ გეგმის მოქმედების დრო.

ნაბიჯი VIII – ბიუჯეტი

ხარჯების ერთად თავმოყრა განსაკუთრებით მნიშვნელოვანია, ეს შეიძლება წარმოუდგენელი ჩანდეს, მაგრამ ზოგჯერ კლიენტს აბსოლუტურად არა აქვს  წარმოდგენა, თუ რამდენად მომზადებულია ის თქვენი გეგმისათვის. ხშირად,  კლიენტები ცდილობენ, უფრო იაფი ხერხით მიაღწიონ თავისი კომპანიის გარკვეულ ცნობადობას. გაითვალისწინეთ დამკვეთის გამოცდილება საკომუნიკაციო კამპანიების ბიუჯეტირების საკითხში. ასევე, მნიშვნელოვანია, ბიუჯეტი განახლდეს კამპანიის დაწყებისათვის არსებული ფასების შესაბამისად.

განაცალკევეთ თქვენი მოსალოდნელი შემოსავალი სავარაუდო ხარჯებისაგან და ორივე მთლიანი რაოდენობით წარადგინეთ. ბოლოს და ბოლოს, აჩვენეთ კლიენტს, რა დაუჯდება მას კამპანია, დაასაბუთეთ ხარჯების ეფექტურობა.

ნაბიჯი IX – შეფასების გეგმები

კორექტულად დაგეგმილი  კამპანიის შემთხვევაში,  საკომუნიკაციო და სამოქმედო ტაქტიკა განრიგის მიხედვით განხორციელდება და პრაქტიკულად იმდენი  დაგიჯდებათ, რასაც ვარაუდობდით. თქვენ მიაღწიეთ ყველა იმ აუდიტორიამდე, რომელიც იდენტიფიცირებული გქონდათ, და დაარწმუნეთ ისინი, რომ მათ სწორედ ის უნდა გააკეთონ, რაც გსურთ.

უთხარით კლიენტს ზუსტად, როგორ აპირებთ თქვენს მიერ მიღწეული შედეგის გაზომვას და რა კავშირშია ისინი თქვენს მიზნებთან. ზუსტად  უნდა განსაზღვროთ რას მიაღწიეთ და რას არა, რათა მოახდინოთ გეგმის კორექტირება და ახალი მიზნების ჩამოყალიბება.

ნაბიჯი X – რეზიუმე

როდესაც იწყებთ პიარ გეგმაზე მუშაობას, აუცილებელია, განსაზღვროთ ვინ იქნება დამკვეთი. ეს შეიძლება იყოს  ორგანიზაცია, რომელშიც მუშაობთ, ან, თუ პიარსააგენტოში კონსულტანტად მუშაობთ, ნებისმიერი ორგანიზაცია შეიძლება  გახდეს დამკვეთი.  პიარ გეგმის რეზიუმე უნდა მიეწოდოს დამკვეთს პიარ გეგმის სრული ვარიანტის წარდგენამდე.

რადგან ის გეგმის დანართს წარმოადგენს, და ეს გახლავთ თქვენ მიერ შეთავაზებული გეგმის რეზიუმე, რომელიც  თავს უყრის რამდენიმე ძირითად საკითხს, რაც დააინტერესებს გადაწყვეტილების მიმღებ პირებს.

 

თუ უფრო ვრცლად და კონკრეტულად გაინტერესებთ პიარ გეგმის მომზადების საფეხურები, შეიძინეთ ელდარ პირმისაშვილის ელექტრონული სახელმძღვანელო: „10 ნაბიჯი პიარ გეგმის შესადგენად” (ელექტრონული წიგნების სახლი “საბა”)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s